藝人促發免費電視牌 鬧爆無綫 一台獨大

成報  D07  |   城市脈搏	2012-05-28
藝人促發免費電視牌 鬧爆無綫 一台獨大
免費電視牌照事件一直係唔少人關心嘅焦點，經過逾兩年嘅漫長審核期，政府仍遲遲未能公布增發牌照結果，而一直對新增免費電視牌照無太大反對嘅無綫電視，前排亦突然高調反對，更聲言不排除以法律行動阻攔當局發牌。對呢一舉動，搞到唔少人都睇唔過眼。 好似噚日咁，袁彌明同陳志全（慢必）就走上旺角街頭，舉牌抗議，身體力行促請政府發放免費電視牌照。二人仲喪鬧無綫，恃住一台獨大封殺藝人，指無綫怕其廣告收入減少先反對發放免費電視牌照。 自稱係受害者 袁彌明就指自己係受害者，佢話：「我喺無綫工作嘅人工好低，未完約就逼我加簽，只係當時無其他電視台揀，去亞視又無發展先逼住簽，政府應該發放多個免費電視牌照，等藝人同觀眾都有得揀。」 袁彌明仲表示，無綫經常拍垃圾劇，之前嘅《天與地》雖然劇本唔錯，但場景好差；處境劇《誰家灶頭無煙火》仲拍到好似卡通片一樣，對白唔似係人講嘅。