政情：袁彌明開班改造宅男

東方日報  A14  |   政情	2011-02-14
政情：袁彌明開班改造宅男
由社民連分裂出嚟，旨在要喺未來選舉「除四民」嘅人民力量，雖然成立無耐，但近日已密密開會，為嚟緊嘅區選做準備。由於人民力量嘅成員唔少都係無甚政治經驗嘅網友，據悉，人民力量已經搵咗自己友、前港姐袁彌明（Erica）作為形象指導，勢要擺脫「宅男」形象，令佢哋可以成為得體嘅區會候選人！ 袁彌明將會開班，幫人民力量嘅成員嚟個「宅男大改造」。 （資料圖片） 人民力量召集人甄燊港坦言，有感香港人好現實，一向都形象行先，故決定搵Erica負責人民力量嘅宣傳部，兼幫班成員嚟個「宅男大改造」，除咗幫佢哋執執個殼外，更會訓練待人接物嘅態度，仲直言嗌咪都需要一套好高嘅技巧喎。Erica早年選過港姐，固然睇得又talk得，但班成員對住佢能否專心上堂，就真係唔知嘞。 甄燊港又話，人民力量喺未來兩個月將會分批接收成員嘅出選意向書，預計三月後會認真作出選舉部署，務求民主黨、民協、工聯會同民建聯嘅候選人，喺每個選區都有人「服侍」。