2010年11月22日

太陽報 SUN世代袁彌明繼續寸

太陽報 
A16  |   港聞
2010-11-22




SUN世代

袁彌明敢言,因為她寸得起。○五年參選港姐,○七年與電視台鬧翻,但她沒有從此消失,反而轉戰商界,美容生意愈做愈大。不用睇人面色,夠資格有碗話碗,上至社會現象,下至娛樂八卦,她都敢於批評。此際踩入政界,擺明車馬咬實民主黨唔放:「一黨之綱都可以背棄,仲點叫民主?」


三十歲的袁彌明(Erica)最近聯同電台主持快慢咇、星屑醫生歐陽英傑及香港人網監察林雨陽等人組成「選民力量」,部署參選明年區議會,打正旗號狙擊民主黨。居於港島的她可會狙擊甘乃威?她說:「所有民主黨雙料議員都係我哋目標,我會積極考慮參選。」


「冇包袱做番自己」


民主黨轉軚撐政改,自言是真民主、真普選支持者的她心中有氣:「民主黨成立原因係要爭取民主吖嘛,劉慧卿話自己係硬骨頭,我以前成日捐錢畀佢,但佢哋連一黨之綱都可以反轉,背棄自己,仲點叫民主?」沒有地區服務經驗,參選可會輸蝕?「要論資排輩,奧巴馬都唔會贏啦,我哋出嚟,只係想畀選民多個選擇。」


袁彌明近年「寸」人無數,由陳冠希到陳志雲都被她明批暗踩:「大家茶餘飯後都會講,我只不過公開講出好多人嘅心聲!」甘乃威被女助手指控性騷擾,「呢啲係ugly(醜陋)囉,但唔夠轉軚核突。」


她的確寸得起,○七年因合約問題與電視台擘面,人人以為她冇運行,豈料她利用知名度做生意,由網上寫blog、拍短片推介化妝品,到現在開了兩間店,又代理美容和健康產品,累積生意額已達三千萬元。難怪她牙擦擦:「我咪一樣唔死得!冇咗個包袱仲好,可以做番自己。」


遺傳嫲嫲硬淨性格


講起一台獨大她就勞氣:「美國啲劇行前香港三十年,日劇行前二十年,韓劇都超前十年,點解要當港人白癡?政府有責任囉,咁多年都唔開放發牌,點會有進步!」


敢言的她硬淨性格似足嫲嫲:「佢係教徒,文革前已在內地傳教,但共產黨唔畀,結果嫲嫲坐咗十年監,佢出嚟繼續傳教,又坐多十年,共產黨話肯認錯就唔使坐,但嫲嫲覺得自己冇錯!我夠膽講嘢嘅性格,應該係佢遺傳。」


袁彌明小檔案
年  齡:30歲
學  歷:聖士提反書院、美國波士頓TUFTS大學經濟系
現  職:藝人、「袁彌明生活百貨」老闆、選民力量庶務主任
選美獎項:2005年度香港小姐旅遊大使獎



做model拍電影 富家女選美為出名




Erica家境不俗,父母年輕時都在美國讀書,她會考有6B,十七歲就被送往美國,畢業於美國波士頓TUFTS大學經濟系。她是孻女,有一兄一姊,家族幾代從商:「我做生意嘅興趣似阿爸,但佢係機會主義者,我就做良心生意,產品試過好用先會賣畀客。」


明年參選區會


十四歲被模特兒公司發掘拍廣告,曾參演《初戀無限TOUCH》、《算死草》等電影。大學畢業後在電盈工作兩年:「前途幾好㗎,可以升經理,但日日好似揼石仔咁,冇目標。」○五年辭職參選港姐,被捧為熱門,最終三甲不入:「我生得矮,預咗,參選都係為出名,出咗名做生意易好多。」


感情生活甜蜜,與金融才俊男友已共賦同居,但她不急於結婚:「出年選區議會,後年到立法會,如果我真係參選,邊有時間結婚生仔!」




2010年11月20日

原來成個幾月無update!

真系好對唔住!

最近忙得好誇張. mimingmart入左好多新產品同consignment啦, 選民力量又多活動(我是選民力量的庶務二課), 仲有黎緊會開一彈新的business---在尖沙咀與友人合資開一家 tea shop, 名為KAMI Teapresso.賣點系用沖Espresso的方法, 用茶葉(不是茶精)和鮮奶(不是致癌的奶精)沖製特濃奶茶. 仲可以選full fat/low fat/skim milk~ 
KA=友人kapo, MI=我, mi ming! 
Kami最近裝修緊, 雖然我話明只系夾錢同做宣傳, 但力不到不為財, 一定要出一分力既.


mimingmart亦將會擴充營業, 再開分店. 黎緊2011要做多d online marketing.


仲有最近市況咁波動, 要睇住個市.


呀, 仲有新樓剛剛裝修好, 要搵租客.


忙還忙, 我非常enjoy現時的生活. 當初決定選港姐, 脫離每日朝9晚6, 一年的10幾日假的辦公室生活, 爭取曝光和名氣, 在傳媒發聲, 繼而從商, 好好彩, 都一一做到了.  


政府打壓樓市的新聞一出, 個個香港人都好關心.  


我呢d叫右派, 聽到加印花稅當然媽媽聲. 不過作為一個普通市民, 我都明白政府的用心. 覺得印花稅措施針對性好強.  1年內比15%, 即系完全wipe out去年的樓市升幅. 而對用家來說, 影響極輕微.


唔知系咪政府想比番個彩金管局攞, 所以整頓埋樓宇按揭成數: 800萬元以上樓宇的按揭成數降低至六成,而 1,200萬元以上更降至五成. 呢招我就覺得連累o左用家. 


 一年前, 政府已經將2,000萬樓宇的按揭成數減到5成, fine, 2,000萬確實唔系人人買得起, 富戶借少d錢買樓啦.


但呢兩年樓價已經升左咁多, 港島樓只要大少少, 可以一家大細加隻狗住, say1,000多尺, 已經一定過800萬, 好d既區更加系一定過1,200萬. 本來可以借7成, 變左5成, 1,200萬既然樓即系差左240萬按揭. 一般打工仔要儲多幾多年錢呀? 


炒家見低息先借錢炒, 祖國買家更加唔使按揭. 


希望這招按揭成數只系"銀行指引", 唔好立例啦.